Главная » 2019 » Март » 6 » Farg‘onaga bu yil 1 million nafar sayyoh kelishi kutilmoqda
06:31
Farg‘onaga bu yil 1 million nafar sayyoh kelishi kutilmoqda
Farg‘ona viloyati tarixiy obidalari, zamonaviy inshootlari, ayniqsa, maftunkor tabiati bilan sayyohlar e’tiborini tortmoqda. Bu haqda O‘zA xabar berdi.

“O‘tgan yili 61 ming 200 nafar xorijiy, 742 ming nafar mahalliy sayyohga xizmat ko‘rsatildi. Germaniya, Fransiya, Rossiya, Italiya, Buyuk Britaniya, Yaponiya singari davlatlardan tashrif buyuruvchilar har yilgidan ko‘proq bo‘lib, bu 2017-yilning shu davriga nisbatan 3 barobar oshgan. Tarixiy, madaniy, ziyorat, agro, sog‘lomlashtirish, gastronomik turizm kabi yo‘nalishlarda tegishli dasturlar ishlab chiqilib, viloyatdagi 22 turoperatorlik firmalari bilan hamkorlikda sayohatlar tashkil etilmoqda”, – deydi Turizmni rivojlantirish davlat qo‘mitasi Farg‘ona viloyat hududiy boshqarmasi boshlig‘i Muzaffar Temirov.

O‘tgan yili Marg‘ilon shahrida “Atlas”, Qo‘qon shahrida “Silk road Kokand”, “Asr”, “Asmald hotel” kabi mehmonxonalar ishga tushirilgan. Turistlarga xizmat ko‘rsatuvchi 10 ta restoran va umumovqatlanish obyekti qurilgan. Farg‘ona xalqaro aeroporti, Marg‘ilon va Qo‘qon temir yo‘l vokzallari, Ahmad Farg‘oniy istirohat bog‘i, Farg‘ona, Marg‘ilon va Qo‘qon shaharlarining turistlar gavjum 31 hududida “Wi-Fi” zonalar tashkil etilgan. Aeroport, temir yo‘l vokzallari va Marg‘ilon shahridagi “Qumtepa” bozori hududida turistik axborot markazlari faoliyat boshlagan.

2019-yilda viloyatga tashrif buyuruvchi sayyohlar umumiy sonini 1 million nafarga yetkazish mo‘ljallangan. Turizm salohiyati va infratuzilmasini yanada rivojlantirish maqsadida tashabbuskor tadbirkorlar mablag‘i, bank kreditlari, xorijiy investitsiyalarni o‘zlashtirish hisobidan 58 ta loyihani amalga oshirish rejalashtirilgan. Bu yil Farg‘ona ko‘plab xalqaro tadbirlarga mezbonlik qiladi.

Viloyatda turistik oqim sezilarli darajada ko‘payishini hisobga olib, joriy yilda 30 dan ortiq yangi mehmonxona xizmatini tashkil etuvchi tashabbuskorlar aniqlangan. Umumiy qiymati 26,2 million dollarlik 22 investitsiya loyihasi shakllantirilib, hozirgi kunda ularning 10 tasida qurilish ishlari olib borilmoqda.
Категория: Mahalliy Yangiliklar | Просмотров: 10 | Добавил: Yoshjurnalist | Рейтинг: 0.0/0
Всего комментариев: 0
Имя *:
Email *:
Код *: